formspring.me

مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ ‏ http://www.formspring.me/Shogad

. تقبلي : ( شكري ) وجزيل امتناني *

حنا إنتهينا .. من زمن .. و أنتي الحين :
................ تقبلي : ( شكري ) .. و سمي و نامي ..






السلام عليكم ورحمة الله وبركاته ،
الجو غاوي ، وانا اموت فالشتا ،
احس فيه هدوء نفسي مب طبيعيي يصير لنا . .


هالاسبوع كان اسبوع الكراااف من الخاطر ،
امتحانين كل يوم ، يعني ربي موسع عليكم ، وسعوا علينا !
لا الاساتذه مصرين يرسبونا فالسنه الاخيره ، ويطلعوها من عيوننا . .
الاحد كان عندي امتحان Scope Management
لاول مره فحياتي اييب هالدرجه 81٪
حسيت ابا اصيح فالكلاس ،
انا الغبيه ما اتعلم من غلطاتي ، كانت كل اجوبتي صح والله ،
وياتني وحده قالت انا واثقه من اجوبتي غيري !
وغيرت ، وطلع كل شي غيرته هو الصح

الاثنين كان عندي Quality & HR Management
اف الكواليتي كان فضيع ، يعني مثل اللي يقولك ارسب او ارسب
وحليت وسويت اللي علي فالامتحان ،
امتحان ال Human Resources يبت فيه 95 %
والثاني للحين ماخذت درجته . .









يوم الثلاثاء مس ال Cost قررت تودينا رحله تعليميه مب ترفيهيه ،
لـ صندوق خليفه لدعم مشاريع الشباب ، كانوا فاجين معرض في ارض المعارض ،
المهم كل هذا عشان نشوف الحسابات . .

الساعه 10 بالضبط تحرك الباص . .

ما طولنا وايد فالدرب . . ربع ساعه ووصلنا . .




كان المكان شبه فاضي محد متجدمنا غير قروب شباب ،
شكلهم من الكليه او جامعه ياين لنفس الغرض ،

على طول وزوعوا لنا اكياس المعرض ،
ودخلنا . كان المكان كله كشكات يعني كل شخص اشتغل على مشروع ،
له كشكه الخاص ،
بس شو كانت الابداعات ، الواحد يحس عمره صغير جدام اللي يسوونه ،
بغض النظر يوم نرمس تكون مشاريعهم صغيره ،
لكن بنفس الوقت الفكره لين طلعت للنور وخذت الدعم كان يبالها وقت طويل ،

صندوق خليفه ينقسم اربع اقسام
خطوه
بدايه
زياده
تصنيع

الاوليه فيها الدعم مجاني ،
والثانيه 3 ملايين درهم
والثالثه فيها 4 ملايين درهم
والخامسه الضخمه يدعمونها ب 10 ملايين درهم ،
الثلاث الاوليات مال طبااخ وشغلات يدويه ،
تعلى وتكبر لين توصل لاعادة التصنيع ،
لكن الاخيره كيماويات وايرات وكهربائيات ، !

شغل فضيع ، صدق الواحد يحس انه فخور بهالانتاج !

جوله سريعه فالمعرض ، !





مشروع رقاقي ولقيماتي ، عياييز يسونه ويطرشونه للي برا واي حد يباه ،
ويطلبونهن فالمناسبات الشعبيه والوطنيه . . !





مشروع الشغلات اليدويه ، اساور شنط وماعرف شو ،
اغلب اللي مسوينه حريم وعياييز الغربيه ، وبناتهن وراثه ،
سألناهن كم يدخلن من هالشغله ؟
قالت وحده ع حسب جودة الشغل ، يعني في حرمه ادخل : 4000 فالشهر ،
ووحده غيرها ادخل بنفس الشهر : 40.000
صدمتني صراحه ،
مشروع خليفه يوفر لهم الادوات وكل شي وهن عليهن يشتغلن بس !




الصورتين الاوليات مشروع كيك ، وقريب بيفتح في زايد ،
والصورتين الاخيرات مواد بلاستيكيه وكيماويه يعاد تصنيعها ،
ومنها الاكياس البلاستيك فالجمعيات !





اول اماراتي وخليجي يوفر فالخليج مصنع او محل ، للتغليف او صناعة الخيوط الملونه ،
تغليف الهدايا وسلاسل وربطات للفونات ، بس فضيع وايد !



+




جانب من الحضور ،
وفالصوره تحت دميه بلاستيكيه ، شكلها عادي ،
لكن من تدخل الكشك تحصل كل شي يخطر ع بالك تلبسه اللعبه ،
شي ما ينشرح بالكتابه ، ابداع مب طبيعي ، في التزيين !




تصنيع الزجاج ،
وتحت محل اماراتي يزود الحفلات ويوصل للبيت ، يسوي البوب كورن
باشكال والوان ونكهات نفس ما الزبون يطلب . . طبعاً فكره اماراتيه . .




مشروع رهش العين . .





وهذا احلى مكان مريت عنده ،
كل شي فيه طبيعي ، بادارة مجموعة شباب اماراتيين ،
كل شي فيه طبيعي من الجوكليت والعصاير والبهارات ، !





وبعدين الصوره الاولى من عاليمين ،
اول اماراتيه تنسج صوف وتسوي منه زوالي صغار ولحافات ،
ماوقفت وايد عندها ، طول الوقت ماسكه الفون بس حرمه كبيره !


والصور اللي تحت الصوره ، واحد اماراتي كبير يسوي الحلوى العمانيه بس مع بسكوت ،
ورطب ويبيع قهوه عربيه جاهزه بس تغلونها ع طول . . !





الخضره مع البيض هذا انتاج مزرعه خاصه كلها باكملها يديرها ذوي الاحتياجات الخاصه ،
ويشرفون عالمشروع من اوله لاخره ، !

باقي الصور كشك ريال يبيع زعفران الماني وايراني ،
بس اكيد الاقبال عالايراني اكثر !



واخر كشك كان ، وحده مواطنه من 15 سنه تطبخ اكلات غاويه ،
واقترحن عليها ربيعاتها تدخل المشروع ، انا عن نفسي تميت شوف وحرق يوف ،
كله من الريجيم اللي يهديه !




خلصنا وطلعنا القاعه الخارجيه والبنات ياكلون ع كيف كيفهم ،
كنا قروب كبير تقريباً 16 بنت مع المس ، او 14 ما اذكر ،





وبعدين ونحن يالسين فجإه نسمع حشره ،
شكينا بالموضوع وسرنا الصوب الثاني ، طبعاً في كشكات وايد بس انا ما صورت كل شي ،
لان في اشياء ما همتني ولا لفتت انتباهي ، يجوز تعيبكم انتوا ،
مثل صناعة بلاستيك ودراجات وغازات ، وملابس حيوانات ،
كل شخص وميوله !


المهم سمعنا حشره ورحت انا وربيعتي للجزء الثاني وشفنا ريايييل هالكثرررررر !
قلنا الا نعرف شو السالفه ،
شو تووقعون طلع ؟؟؟؟







بعدها الرؤيه مب واضحه !




وفجأه قربت السالفه للوضوح ويطلع شيخ الشباب كلهم . .





صورته وايد يمكن خمس ست صور ،
بس ما فيني انزل كل الصور . .



وعقبها حولنا للباص وردينا للدوام ع طول . .
كانت رحله غاويه استانسنا وااايد الحمدلله ،..



عقبها بيومين طلبت منا مس Communication نسوي شغل عن مشروع وهمي ،
هو اننا بنسير اولمبياد لندن . .
وكان الشغل وايد حلو وللحين ماخلصنا ، !
بس انا سويت بوسترين للقروبين اللي فالكلاس ، قروبي والقروب الثاني ،


+








مسحت اسامينا ،
البوستر اللي فوق مال قروبي ،
والثاني مال القروب الثاني ،
اسميها استوت سالفه وحشره ،
اذا الله عطانا عمر عقب بقولها لكم ،
الحين تعبت وايد !






واخيراً ملح البيت ونور العالم والكره الارضيه والمجره ،
اللي محد يسوا غلاه عندي الله لا يحرمني منه . .





بالأمس كان عتاب الأحباب تلميـح
..............................واليوم كـل ٍ مستريـح بحياتـه !

يوّميّــه

أنا ما أخطيت ! هذا رد فعل .. لكل ما قاسيت ..
تماديت بدلاله .. لين زاد الكيل عن حده





ياللللله ربي يسعدلي مساكم وصباحكم وكل اوقاتكم . .

مر وقت طويل من اخر لقا صار بينا ،
لكم وحشه قد السما والكون والارض ،
لدرجة اني حتى نسيت اكتب بالعربي وعادي اكتب لكم بروجكت . .

اااه استغفر الله العظيم من هالكورس ،
دوام زفت ووقت ازفت ، لكن مستمتعه لابعد حد . .
الدراسه غير ، ومواد التخصص غير ،
لكن للاسف مب ميولي ولا اختياري ،

>> بتتخرج وبعدها تلطم

المهم ، صرت اخذ 6 مواد تخصص
Cost , Time , Risk ,Communication ,
Scope and Quality Management

كل وحده تقول فالصعوبه الزود عندي . .
وانا الفقيره المسكينه دبسوني في مادة ال Cost
والله وايد صعبه وكلها حسابات وكشوفات وارف ،
وامتحنت وانا ميته خوف ، وتميت اهاذي اني بييب فالخمسينات ع كثر ما افكر ،
وخبصت فالامتحان واربكت كل من حولي ،
واخر شي يبت 95 ٪





شو ما قطعني بنات كلاسي ،
يالمصريه ويالمصريه ، هذا وانتي تقولين مب فالحه فالماث . .
عز الله انصكيت بعين وعدت الكورس . .
انا لازم قبل اسير الدوام ادخن عمري بلبان . .
عشان يشردن مني البنات كلهن .،


يقولكم الخميس اللي قبل اللي طاف ،
قررت اني اروح اتمسح عشان اصلي الظهر ،
وقلت للمس بطلع قبل الوقت ، اوني سايره اتمسح الساعه 11 ونص الضحى ،
قالت لي المس بدري قلت ماعليه برد لانه بيستوي زحمه . .

دخلت عزكم الله الحمام ،
وخلصت وضوئي ، ومديت ريلي بمسحها ، وانا داخل الحمام ،
ما الذي تتوقعون حدوثه ؟؟؟


الاولمبياد الصيني وانواع الشقلبه ،
مب انا طبعاً



البلاكبيري نط من مخبى البنطلون ، لوسط البالوعه . . " فيس يزوع "
كانت نظيفه لا تلوعون كبدي ،
اهم من كل هذا اني طلعت من الحمام مصروعه ،
شفت تلفوني يغوص داخل وفقاعات الماي تتغلغل فيه بقوه ، !

دخلت ايدي وطلعته . .

فجيته قطعه قطعه ، وفريته فالشمس ،
ورحت كلاسي وبعد مرور نص ساعه جربت اشغله ، اشتغلت اللمبه الحمرا ،
وعقب بند للابد . . !
واعلن الوفاه . .

تميت متحرقصه للويكند ،
وما كنت اريد اشتريه بنص الاسبوع عشان الميزانيه اخر الشهر ،
وجان اصبر للخميس ، ونزلت الرواتب . . وطرت وخذيته . ،.

9900 اليديد




استوت لي وايد اشياء ثانيه بعد ،
امتحان الكوميونيكيشن الثاني يبت فيه 100 ٪
ياللله عقبال ما اتخرج بامتياز . .
مستمتعه ويا البنات والقروبات لاول مره مع اني ما احب التأخير !
ولا احب اعتمد ع غيري ابد . . .


هممم ،
حياتي طبيعيه مافيها شي مميز ، ،
اكثر شي حسيته تغير ، ان توطدت علاقتي فناس ما توقعت وجودهم ابد ،
يعني مب بمعنى عميق بس صرنا قراب شوي من بعض ،
مب شخص ولا شخصين . ، كذا شخص وكذا ربيعه ،
احس رديت لستايلي القديم ايام المدرسه . .


المهم ،
ان شاء الله برجع لريجيمي هالايام ، خلاص زهبت العده ،
وبرجع امشي واخفف اكل ، وبستعد ،
لان بصراحه اهملت نفسي وايد ، وضيعت وقتي وايد ،
واستويت الحين درام متنقل من مكان لاخر ، !


وفي شي ثاني ،
صارلي اربعة ايام احس بخوف من شي مجهول ،
شخص مجهول ، موقف مجهول ، شعور غريب مجهول بعد . .
قررت اشغل سورة البقره قبل ارقد ،
مع هذا في شي احسه كاتم ع نفسي وصدري و ماقدر اتنفس ، .
ولا اقدر ارقد عدل ، انا اللي كنت اخمد للصبح ،
صرت خمستالاف مره انش فالليل
مع اني مداومه ع اذكاري وصلاتي وماله علاقه . .
وفوق كل هذا ، احس انش الصبح وافكر اقول شو الشي اللي بيستوي اليوم ؟؟
وبيخوفني ؟؟؟


وبس مافي شي مهم اذكره ،
اذا في شي بخبركم اياه ،
عندنا كذا رحله هالكورس ، وفي منهم لـ دبي . .
يلا وناسه والله ، !استعدولي يا هل دبي من الحين . .



وقبل الختام ،

فيه شي احلى من هالشي ؟؟



نور البيت وبهجته عسى الله لا يخليني منه ولا من شوفه ،
بعد طوايف هلي وحبايبي كلهم ، .
والله اذا شفته احس كل همومي وتعبي يذوب ،
عاد اذا ابتسم كل الدنيا تضحك وراه . .

*الصوره الثانيه بالفون امه صورته عسب جي مب واضحه . .



نطلع شوي ، ونروح للفلسفه ، :

كل كلامي عن العلاقات ،
يمكن يكون شي مب منطقي اللي اقوله ،
لكن ، علاقاتنا البشريه شي عجيب جداً ، غريب جداً ،
ومستحيل وغير قابل للتصديق ، !

وحتى محال نشرحه . .، !
اذا في علاقه ربطت بشر في بعض ،
اثنين / خمس / مجموعه ،
المفروض يعيشون علاقتهم بحذافيرها بدون قيود او حدود ،
بس في حدود الاحترام . .
اتكلم عن العلاقات العميقه . ،

هذا مب غلط ، لكنها فجوه محسوبه ضد الطرفين ، ،
ليش؟

اذا انا حبيت شخص بكل مافيني من قوه احبه ،
وبكل شوقي اشتاق له ،
وبكل غيرتي اغار عليه ، ،
انا مب ينبوع ولا بحر ولا سما ولا غيمة مطر ،
مصيري انضب واجف وانتهي . . !

انا ضد اللي يقول لا تعلق امالك كلها في شخص وحد ،
بالعكس انا اذا احب شخص بعطيه اللي قدامي واللي وراي ،
وبلغي الكره الارضيه لعيونه . .
لكن بأمانه انا مب ضد التعمق فالعلاقه والغاء الناس . .

انا ضد اننا نحب بكل ما اوتينا من حب ،
لان الفراق في هالحاله يكون شبه مأساوي ،
يموت فيه واحد من الاطراف حزن ، والطرف الثاني يموت برود . . !
انا احب اوكي لكن بحدود ،
عشان يبقى عندي شي اعطيه على مدى العلاقه ،
ونبسطها اكثر ،

على سبيل المثال ،

انا لو عندي ياهل صغير ،
اذا غلط اول مره بتجاهلها ،
اذا غلط ثاني مره ، بحسسه انه غلط ،
ثالث مره ، بعطيه نظره ،
رابع مره بهزبه ،
خامس مره بمد ايدي . .

يعني عندي مخزون عقوبات !

في اسلوب ثاني ،

اذا غلط بصفعه ،
ثاني مره بذبحه بالواير ،
ثالث مره بقطعه بالخيزرانه ،
رابع مره بمد ايدي ،
خامس مره بجرب كل اللي فوق ، !

ولا كأني سويت شي

هالطفل بيتخدر من الضرب ،
كلما غلط بيقول بنضرب دقايق وعقب بيروح العوار ،

بالمختصر انا مابقيت شي للي ياي ،
والحب بالمثل ،
لا تحب بكل مافيك ،
جزىء الحب او المشاعر عالشخص ،
شوفه للياي ، !

انا بحب فلانه او فلان شهرين بعنف ،
بعد الشهرين بلقاني ما اتقبل وجود الطرف الثاني ،
لازم نكون متوازنين ، فعواطفنا ،
اذا نبا نلغي علاقات قديمه ، نلغيها بس بدون جرح ،
ما نعيش جرح بيننا وبين من نحب ،
واذا يانا طرف ثالث ، يكون بلسم بين الاثنين ،
يميل له واحد من الاطراف ، !


ويوم من الايام يرجع الطرف الاول للثاني ،
طيب الطرف الثالث اللي كان بلسم " مؤقت " وين يروح ؟


الحياه تبا منا حكمه وتروي وهداوه ،
تبا توازن عاطفي ، قبل يكون توازن فكري . .


والله المستعان ،




وربي يحفظكم . .




ترى التواضع ليا من زاد عن حدّه
يضعفك في عين غيرك وأنت ما تدري

توأمَي ♥.♥

في زاويَه بعيده في هذا العالمْ ، توجَدْ لديّ صديقَه ،
تتنفّس ذرات الهواء التي أتنفسها ذاتها ،
تشرَب من نفس الماء الذي أشرَبه ، وتأكل نفس الطعام الذي آكله ،
وتعيش بنفس الطريقة التي أعيشْ !


صديقتي هذه ،
تستخدم نفس الأدواتْ التي أستخدمها ،
وتلبس نفس الخامات التي ارتديها . .
نفس الحاسوب ، الهاتف ، الشبكه العنكبوتيه ، !
تمّشي بكلّتا قدميها ، وينبض في صدرها قلبٌ يحملني معها اينما ارتحلت ،
تشعر بما اشعر من حب ، عطش ، ملل وضيق واحزان . .


صديقتي تشبهني في كل شي ،
ونعيش الضدّ في كل شيء ،
العديد من الأشياء البشريّه تجمعـــنَا . .

ولكننا نختلفُ في أمرٍ مُعضلٍ واحد ،
هي تظنني قادرةَ على المُضي بدونها يوماً ما ،
وأنا مؤمنَه بأن الحياه مستحيله من غير وجودها ♥.♥

جرّعَة أمــَل ♥

*
الأمـَــل ْ

حفنَه من نور ، وضوء ،
تأتي من السماء ، متلئلئه كالنجوم ، تنزل بشكلٍ قوّسيٍ جميل ،
ينساب من العلو لداخل قلوبنا ،
يمسك فرشاة قوس قزح ويلوّننا من الداخل ،
يبيد كل المساحات الرماديه الباهته ،

يقوم بلا استئذان بتلوين جدران قلوبنا ،
ومآقيـــنا ، حتى نرى العالم بأكثر من سبعة ألوان ْ . .

هوَ الشيء الذي نشعر مع بنشوة فرح ،
وفراشات تحلّق بصدرونــا . .

هو الذي يقول بلا تكلف او تصنع او هواده ،
إن الله لو قال للشيء / كن سـ يكون . . ♥

أترى يعود الطير من بعد اغتراب ♥ ؟!

مَــا أمرّ الذكرياتْ . .
حتى وإن كانت جميلة ، وقضينا فيها أصدق أيام الحيَاه . .
ما أصعب الذكريات ، حينَ تتكدس بها ذاكرتنا . .
فتبدو ممرات العقل والقلب مكتظتاَ عن بكرة أبيها بصناديق أنيقة مغلفةَ بإحكام ْ . .

تحمل لهذا دمعةَ ذات ليل ، ولهذا عناقاَ ذات وداع ،
ولذلك قهراً ذات ظلم . .

ما أصعبَ الذكريات ْ . .
حتى وإن ظننا أننا تخلصنا من بقايا الماضي ،
فهو يبقى روحاً تختفي وتجيء داخلنا . .

كل الكتابات العالقة في جدران قلوبنا للماضي،
تحنّ لما قد ولى ، ولو ظننا " وهماً " أننا قد شُفينا . .

ولو عشنَا دهراً ، نمارس " كذباً " النسيَان . .
سيأتي يوماً ما " دبوسٌ " صغير ، يفقأ عينَ فقاعات الذكرياتْ . .


حينَها لن تفيدنا حتى كفيّنا الإثنين في تكفيف مدامعنا ،
مهما كان الماضي جميلاً . . ♥

♥ Because you loved me

I may not get to see you ♥ as often as I like. I may not get to hold you♥ in my arms all through the night. But deep in my heart I truly know, you're♥ the one that I love♥ , and I can't let you go ♥ . .

{ رفقاَ بهـــنْ . .

إنني لأعجب أشد العَجب حينَ أكتشف أنه لا زال بيننا من يعيش عيشة الكهوف وعصرَ الإنسان الخرافي ،
بينما في الجانب الآخر من العالم من يفسّر الزلازل والذرات وكوارث الأرض ،
بل ويبحث عن وجود كائنات في العالم الخارجي . . !؟

إن مجموعه من البشر تنظم لنفسها إيديولوجيّه خاًصه ،
تندرج تحت مسمى " إنتِ بنت ، و أنا ريّال "

تسبب لي غثياناً مقيتاً ، وعسر هضم مستمر ، !

في حين أني لم اسمع في كل العقائد والمعتقدات ، والسلالات البشريه الداثره ولا القادمه ،
ولا حتى في قصص ابن المقفع ولا حكايات الخيال ، ولا حتى اعظم كتب الشريعه السماويه القرآن الكريم ،

أن النار بها اماكن للنساء واخرى للرجال ، !

جهنم سـتجمع الجنسين بنفس المكان وبدرجاتٍ مختلفه ،
فلماذا التفرقه العنصريّه ، ؟
ولماذا الحزازياتْ التي تنتهي بقلوب متفارقه رغم الوجوه الباسمه كذباً؟

لا زلت حتى هذه اللحظه اعاني صداماً نفسياً مع ذاتي الداخليه ، والعالم حولي !
أ رُغم ان اغلب علامات الساعه قد بانتْ ، ووصلنا من العلم ما بلغنا ،

لا زال الحديث المُنصب في آذاننا كالرصاص الذائب ،

" تظليّن بنت ، تظلين أنثى ، إنتي حرمه ، إنتي زجاج ، إنتي قطعه بيضا "


من أينَ لكم هذه الفلسفه الهوجاء التي لا يعيشها ابداَ حتى قانون الغاب ، ؟

يُحزن قلبي على من يعاملونها كأنها أمةٌ جاريه ،
لا وجود لها وإنما وُجدت في اغلب الأُسر رقماً زائداً وقت العدّ . .


أطهر من انجبته نساء الأرض ،
الذين لو اجتمع ذكور العالم بأكمله ما تساووى مع موطء قدمه ،
محمد صلى الله عليه وسلم
قال وهو مودعٌ في خطبة الوداع :

" فَاتَّقُوا اللَّهَ فِي النِّسَاءِ فَإِنَّكُمْ أَخَذْتُمُوهُنَّ بِأَمَانِ اللَّهِ . . . " الى اخر الحديث . .



فكلنا من تراب وإلى تراب ،
لا يكفن الرجل بثوب مرصّعٍ بالزمرّد ،
ولا تكفن المرأه من صوفٍ خشن . .

لا نطلب الحريّات الفاضحه ولا الوجوه الكاسيه العاريه ،
نحن فقط نسأل ما طلبه رسول الله صلى الله عليه وسلم ، حين قال " رفقاً بالقوارير . . "



ورَحم الله ابن باز فيمَا أفتاه [ الفتوى ]

A moment to remmber

هاي قصة فلم كوري شفته ، ♥.♥
مب عيبني بس ،
شويه لو اقول / I cried a river while watching the movie


ما فيه موت ولا جروح ولا فراق ولا أي نواع من أنواع الألم الجسدي ،
الفلم " يحرّك " كل الحواس الداخليه ، حتى اللي تتوقعون انها ميّته من سنين ♥.♥

انا صدفه شفته ، كانت الساعه تقريبا 11 فالليل ،
وكان الوقت شتا يعني فشهر يناير 2011 ،
ما قدرت ارقد لين خلصته ، بس والله ما قمت الا وعيوني مثل عيون البومه ، O.O
وخشمي احمر وويهي وارم ، طلعت بغسل وشافني اخويه ،
ماصدق اني اشوف فلم لين دخل الحجره وشاف اللاب X.X


الفلم يخلي عيونكم تتحول قلوب ♥.♥

القصه خرافيه ، هي قصة حب حزينه جداً ،
تزوجوا من اول عشرين دقيقه فالفلم ، وبنص الفلم البنت تبدا تحس بأشياء غريبه ،
وحتى ريلها لاحظ واصرّ انها تسير الدكتور بس ما طاعت ،

وبعدين بدون مايدري راحت ،
كانت شاكه انه تعب وانهاك . .

شو قالها الدكتور ؟
كيف قدرت تكتم عن ريلها ؟
وكيف اكتشف ؟
شو كانت ردة فعل ريلها ؟
وشو سوت بعد كل هذا ؟

كل هذي تفاصيل مابحرقها عليكم ،

لكن والله اخر عشرين دقيقه فالفلم ، خلو عدالكم اطنان كلينكس ،
او انصحكم اوقفوا عدال مغاسل البيت وشوفوا الفلم . ، لأنه جد انساني بكل معنى الكلمه ♥.♥



بحط لكم رابط تحميل الفلم ،
مع صورتين للبطل ♥.♥
ما بحط صور البطله عشان مدونتي مافيها صور حريم ْ . .



































وهني رابط الفلم تورنت طبعاً [ تحميل ]
لغة الفلم : كوري
الترجمه : انجليزي

وهذا رابط ترجمه بالعربي للي يتابعون بالعربيه . .
[ تحميل الترجمه العربيه ]


وأتمنى لكم مشاهده ممتعه ♥.♥

سويتْ خرق كل قوانين الطبيعه . .

اليوم قررّت اسوي سويت " طبق حلو " S:
مع اني مب شاطره ابداً في الحلويات ، يمكن لاني ما احبها وايد . .

المهم فتحت لابتوبي الحبيب ، وتميت ادور ،
ولقيت شي لا باس فيه . .
دخلت المطبخ وخليت اللاب مفتوح ، ويات اختي اللي اصغر مني ،
ووقفت وراي وتمت تضحك بهستيريا . .

" إنتي من صدقج تبين تسوين هالسويت ؟"
" ليش حسستيني انه بلبن العصفور ؟ "

وتضحك وتصك الدنيا ضحك . .
وانا مت قهر ، يعني سخافه صدق تحطمني وانا توني في عالم الحلويات مبتدئه
المهم سويتها وخلصت ،
هي كان يهمها يكون شكل السويت نفس اللي خذته من اللاب ،
كان وايد صعب ، ما بقول عشان وعشان ،
بس انا المفروض كنت احط " جرفه " وفي مسمى اخر " قرفه "
لكن قلت شو الفايده بتطلع نفس السينابون وانا توني قبل يومين سويته . .
فقالت لي حرمة اخوي سوي " بودرة كاكاو "

وقت ما نحن نمسح العجين بالزبده ،
ونرش كاكاو ، " نسكويك "
كانت العجينه مع كل لفه تذبل اكثر ،
لأني ماحسبت حساب ان الكاكاو بيذوب عكس الجرفه . . 3/>

المهم خلصتها ،
وكانت هذي النتيجه النهائيه . .
على فكره هالسواد بودرة كاكاو " نسكويك "
مب محروقه يعني . . :$
















وهذي بعد التزيين . .















وللأمانه يعني ،
الطريقه مُتعبه وصعبه شوي ،
وفالأخير رغم مقبولية الشكل ، و جماليته نوعاً ما ،
لكن وقسم طعمها يلوع الجبد ، وقسم تحسون تاكلون جريده ،
والحمدلله على النعمه ، .
انا زودت جيلة طحين من راسي عسب جي ما ضبطت ،
فلسفه اوني يعني منال العالم :$


ودمتم بودّ يعني . . (F)